யாத்ரிகனின் குறிப்புகள்

361 degree release

2011-06-08T07:55:00.000-07:00

361 degree - 1 st issue

2011-06-08T07:52:00.000-07:00

நரனின் உப்புநீர் முதலை - ஒரு வாசகப் பார்வை-நேசமித்ரன்

2011-05-09T08:45:00.000-07:00

உப்பு நீர் முதலை - நரன்

உப்புநீர் முதலை - இந்த தொகுப்பின் தலைப்பில் தொனிக்கும் நுண்சுட்டல் குரலே நரன் கவிதைகளின் டெசிபல் அலகாய் இருக்கிறது. பொதுமையான விளிகளுடன் வாசகனுக்கான பிரதிவெளியை விரிக்கும் கவிதை மரபில் இருந்து விலகி கண்ணாடி வெட்டும் ஸ்க்ரைபர் சொல்லாடல்களால் தன் கவிதையை முன் வைக்கிறார்.

(இடைக் குறிப்பு -1 - விமர்சனம் என்பது தீர்ப்பு வாசித்தல் எனப்படுவதில் முற்றும் முரண்படும் வாக்கியங்களை நம்பும் அகவெளி, விமர்சகன் தன் தர்க்க மற்றும் உணர்வு நிலைக்கு அணுக்கமான பழகிய கண்ணோட்டத்தினை துறந்து பிரதியை அணுக வேண்டுமென்பதில் தீர்க்கமாய் இருக்கிறதாதலால் முன்/பின்வரும் சொற்கள் வாசகக் குறிப்புகளாகவும்,நெஞ்சோடு கிளத்தலாகவும் வாசிக்கப்படக் கடவது .)

தொகுப்பின் மஜ்ஜைகளில் ஜென் பிரகாரங்களின் வௌவால் வீச்சமும் குழந்தைகள் உலகின் கால எந்திரப் பயண முகில் துகள்களும்.Metrical Verse என்பதைக் கடந்து உள்ளிருக்கும் Philosophical acuity இதன் பிரத்தியேகம். வகைப்பாடுகளின் வழி இவை சிலேடை,யமகம்,மடக்கு மற்றும் சித்திரக்கவி எனக் கொள்கிறேன்.

கண்மாய் நடுவே

உலகின் முதல் நாளில் ஒரு நுனியும்

கடைசி நாளில் மறு நுனியும் கட்டி

சேலை

காய வைக்கும்

பெண்ணைக் கண்டேன்

என தேவதச்சன் எழுதிய ’காலத்திற்கு’ அணுக்கமாயும்

………

வெளி சிறுத்துக் குறுகும்போது காலமும் ஒடுங்கி

விடுகிறது.

உன் அடர் வழி நினைத்துக் கலங்கும்

தொலைவு தொலைந்து கொண்டிருக்கும் மஹா விருக்ஷம் அகண்ட வருஷம்

ஒரு சாண் இடுப்பில் அடங்கி விடும்

என்ற பிரம்மராஜனின் வரிகளுக்கு எதிர்நிலையிலும் இயங்க முற்படுகிறது.

கிடுக்கிகளற்று சகலத்தையும் தீண்டிப் பார்க்க விரும்பும் புசித்துப் பார்த்து விட விரும்பும் குழந்தையின் மார்பக ஞாபகம் உள்ள கண்களும் ரேகைகளும் மாளாது வைத்திருக்கும் மாங்கருவண்டும் தேரையுமாய் ஓவியனாயும் கவிஞனாயும் இருந்தியங்கும் மனவெளியின் வார்ப்புகள்.

காலத்தின் சார்பு நிலையில் இருந்து நீட்சிக்கு நகர்த்தும் உள்ளுணர்வின் (intuition) சொல் விளையாட்டுகள் வழி அஃறிணை உயர்திணை தீர்ந்த பொதுத்திணை வாழ்வின் இயங்கியபடி இருக்கும் கணங்களை மொழிக்கு கடத்தி இருக்கிறார் நரன்.பிரக்ஞை தொலையும் கணத்திற்கு விரும்பி நகரும் தருணவெளி வர்ணங்களால் ,எண்களால் ,கோடுகளால், மிருகங்களால், பறவைகளால்,கோணங்கள் மற்றும் பாகைகளால்

சுமத்தப் பெற்றிருக்கும் அடையாளங்கள் மீதான வினவுதலை வடிவங்கள் உடனான சார்பு / உறவிலி நிலையை க்யூப் விளையாட்டு சதுரத்துள் இருக்கும் சதுரங்கள் போல் மாற்றி மாற்றி அடுக்கிப் பார்க்கிற கவிதைகளில் பெயர்கள் ,க்ளிப்புகள் நீருமிழ்வுகள் பரீட்சித்தபடி உலகை அணுக முனைகின்றன

இன்மைக்கும் இருப்புக்குமான இடத்தை சப்தத்தால் பிணைத்தல் துவங்கி எதிர் விளிம்புகளை முடிச்சிட முயலும் காரணிகளில் மைய இழை என இருக்கிறது /இருந்தது /இருக்கக் கூடும் காலம், காலம் மேலும் காலம்

வரிக்குதிரைகள் ,கொக்குகள், முதலைகள்,சிறுவர்கள் ,சிறுமிவழி தன் பால்யத்திற்கு சென்று மீளும் பேரிளம்பெண் ,முயல்கள் & இருதலை சர்ப்பங்கள் என பாடு பொருட்களில் தண்டவாளத் துண்டுகளின் இணைகோட்டுத்தன்மையும் கோடை இடைவெளியும் குறுக்கு கட்டைகளின் பிணைப்பும் இருக்குமாறு கவனமாயிருக்கிறார்.தன் வாலுண்ணும் பாம்புகளின் சித்திரமும் தம் குறி சுவைக்கும் ஈருடல் யாளிகளும் பிம்பமாக்கும் கவிதைகள்.

கவிதைச் சொல்லி தேர்ந்திருக்கும் வர்ணங்கள் வெளிர் தன்மையுடன் ஒரு சீருடை பாவத்தை வாக்கியங்களில் அமர வைப்பனவாய் இருக்கின்றன. நன்மை X எதிர் நன்மை என்பதில் துவங்கி பைனரிகளை அடுக்குதல் மூலம் பிறிதொன்றாய் விரியும் கவிதைகளை எழுதி இருக்கும் நரன் தனதான உலகின் பார்வைக்கு நம்மை பழக்குகிறார்.மொத்தமாய் வாசித்து முடித்ததும் கட்டப்பட்ட கண்களை அவிழ்த்ததும் வரும் நிறக்குருட்டுத்தனம் வாய்க்கிறது.

இசைக்குறிப்புகளில் மௌனத்திற்கான கனம் போலவே சொற்களிடையே (Diction) இருக்கும் தசம இடைவெளிகளில் இராணுவக்கால்களின் பாகை மாறாத குறுங்கோணங்கள் .

(இடைக்குறிப்பு -2 Though it’s futile & lame quest as penning poetry is framing the momentum of madness…)

ஒரு பறவைப் பார்வையில் பிரார்த்தனை கூடத்தின் பெஞ்சுகளின் முன் மண்டியிட்டிருக்கும் செவிலியரின் பிம்பம் வந்து போகிறது.

நுட்பத்தை பேசும் அதே நேரம் லேபிள் ஒட்டப்பட்ட மியூசிய கண்ணாடிக் கூண்டுகள் போன்ற உலர்தன்மையும் தோன்றக் கூடும் மீள்வாசிப்பில்.

தொடர்ச்சியான கவிதை செய்தலில் கைக்கொண்டிருக்கும் வடிவம் பின் வரும் எதிர்நிலை நிறங்கள் மற்றும் எண்கள் வழி அமையவிருக்கும் பின்னல் கண்ணிகளை (Looping Elements of text)அனுமானங்கள் மூலம் நிறுவிப் பார்க்க முயலும் வாசக மனத்திற்கு ஒரு மாற்று மொழிதல் அவசியமாய் இருக்கிறது என்பதை அவதானத்தில் கொள்ள வேண்டியவராகிறார் கவிதைச் சொல்லி

காலாவதியான பிரச்சாரத்தொனி அற்ற, வாதையின் நோய்மை படிந்த பிளாஸ்டிக் பதங்களால் எழுதப் பெறும் சாம்பல் வாக்கியங்களில் இருந்து துண்டிக்கப் பெற்ற, புரட்சிகர துணுக்குகளால் ஆன எரிந்த மோட்டாரின் தாமிர வாடை வீசும் மொழிதலில் இருந்து தன்னை விடுவித்துக் கொண்டிருக்கும் இந்தக் கவிதைகள் பழங்குகையின் இடுக்குவழி கசியும் கீற்றொளியில் அசையும் சிலந்தி வலை. ஆனால் பார் விளையாட்டுக்காரனின் அந்தர அலைவைப் பார்க்கும் அடிநெஞ்சில் சப்தமிடும் பெண்டுலம், கவிதை வாசிக்கும் ஆசிய மனதின் தேவையாய் இருக்கிறது.

கவிஞனுள் இருக்கும் ஓவியனின் கோடுகள் செதுக்கும் வாக்கியங்களின் நேர்மை வழி மாய யதார்த்தத்தை விழையும் ப்யூசன் மனம் பருவங்களை மீட்டெடுக்கவும் பின் சென்று நுகரவும் எத்தனப் படுகிறது. இருவேறு புலங்களின் பௌதீக உடலங்களை பொதுமைப் படுத்தும் வேதியல் சமன்பாட்டை நிறுவி விட்டு தன் பேனாவை எடுத்துக் கொள்கிறார் நரன். சட்டப் புத்தகத்தின் ஷரத்துகளை எழுதும் அதி கவனத்துடன் ஒரு ஏவுகணையின் குறையும் மைக்ரோவிநாடிகளால் இறுதி வரியை நோக்கி நகர்கிறோம் நாம்.

அனுமதிக்கப்பட்ட தொட்டி வெளிகளில் அந்தரங்கங்கள் ஏதுமற்ற மீன்களின் இனப் பெருக்கமென கண்காணிப்பின் ஆய்வுமேசையில் நெளிந்து கொண்டிருக்கின்றன குழந்தைமையின் சுவடுகள் மற்றும் தண்டனைகள்.

வாசிக்கப் பெறுகிற எந்த கலாச்சாரப் புலத்திலும் (In any given culture) சிற்சில பெயரியல் மாற்றங்களுடன்,. திகழ்ந்து கவன ஈர்ப்பை பெற்று விடக் கூடிய வகைமையில் பொருந்துகிற கவிதைகளாக இருப்பது புதிய திறப்புகளை நோக்கி நகர வாய்ப்புகளை வைத்திருக்கிறது கவிதைச் சொல்லிக்கு.

புனைவில் மெய்மைக்கு அணுக்கமாக நகரக் கூடிய ஒப்பீட்டு இருப்பு (Verisimilitude)வாசகனின் தர்க்க மனத்தின் வழியே கிளைக்கும் வெளியேற்றம்/விடுதலைக்கு இணக்கமான படிம வெளியை உருவாக்குவதில் நரன் எய்த வேண்டிய உயரங்கள் இன்னும் உண்டு.

Onomatopoeia என்று செப்பலோசைக்கும் செயலுக்கும் தொடர்புடைய சொற்களை அழைப்பது போன்று வடிவத்திற்கும் வினைக்குமான பிணைப்பை (Hyperbole) நுட்பமான வகைப்பாட்டில் மொழிப்படுத்தியிருக்கிறார் உலகத்தை அணுகுதல் துவங்கி தொடரும் கவிதைகளில்…

பதினாறாம் நூற்றாண்டின் ஜார்ஜ் ஹெர்பர்ட்-ன் ’ஈஸ்டர் சிறகுகள்’ என்ற வாசிக்க/காண வாய்த்த முதல் பேட்டர்ன் கவிதை. இரண்டு பறக்கும் பறவைகளின் சித்திரத்தை காட்சிப்படுத்தும் இக்கவிதை முறை வழி நரனின் படிமங்கள் உருவாக்குவது குழந்தைகளின் உலகம்.

Practical lexicography என்னும் அகராதி அடுக்குமுறையின் சாயலில் நேர்- நேர் பொருள் கொள்ளும் தசாப்தத்திற்கு முன் துவங்கிய சொல்முறையின் பரவலால் பாதிப்புறாமல் பிரதியின் ஆன்மா வாசகனின் ரேகைகளுடன் உருப்பெறும் ஈரப் பதுமையாக பிறிதொன்றாகும் இடத்தில் புனை பிரதிகள் நரனல்லாத தனித்ததொரு பிம்பத்தை உருவாக்க முயல்கின்றன. கனிகளை காட்டிக் கொடுக்கும் பறவையின் சப்தம், கவித்துவம் கோரும் கவனயீர்ப்பு.

நீரின் மேல் இலையைப் போல் நகரும் நீர்பறவையின் கால்கள் கவிதையில் சொல் மற்றும் வாசகப் புரிதல்.ஒரு பெருவெடிப்பு கணத்தின் குறுக்குவெட்டு தோற்றத்தை எளிய சூத்திரத்துள் எழுதிப் பார்க்கும் கவிதைகள் முன்முடிபுகள் நிரப்பப் பெற்ற கணிதங்கள் கடந்து திறக்கும் ஆகாயத்தின் கோளடுக்குகள் மற்றும் பால் வெளித் தூசுகளுடன்.அணுக இலகுவான மொழி வழி கவிதைச் சொல்லி உயிர்ப்பிக்க விரும்பிய பிரபஞ்சத்தின் சாத்தியம் வாசகனின் தோலுரியும் கரத்தின் தொங்கல்களில்.

புரிதல் குறித்த அவதானச் சிக்கல் (Decoding the text) புழக்கத்தினால்
மட்டும் கடக்கக் கூடிய சொல்லமைவுகள் பெரிதும் அற்ற தொகுப்பாய் இருக்கிறது.பிரதியின் குவிமையம் ஏழு கடல் /மலை கடந்து ஒளித்து வைக்கப் பெறுவதாய் இல்லை திசைகாட்டியும் வழித்தட வரைபடமும் வழங்கி பயண ருசியை வாசகனுக்கு வைக்கிறார் நரன்.

பழகிய மன அமைப்புகளுக்கான துயரத்தீனி அல்லது உணர்வு ரீதியான ஒத்தடங்கள் இன்றி சீசா பலகையின் மேல் நிலை நொடியில் ஒரு புகைப்பட பிளாஷ் கணத்தை தாளுக்கு கடத்தும் பிக்செல் ஓவியக்காரரின் தொகுப்பென இருக்கிறது.

சூதாட்ட சோழிகளின் கடல் மூலங்களில் நகர்ந்த தூரங்களை வெளியுருண்டு கட்டங்களுக்குள் நகர்த்துகின்ற வித்தையுள்ள சொற்களை கண்டறிவது கவிஞனின் ஆகச் சிறந்த சுவாசத்தின் உஷ்ணம்.பிறகான கவிதைகளில் நிகழ விரும்பும் கோளியக்கங்களுக்கான வேர் தூவிகள் இந்தக் கவிதைகளில் இருந்தே ஆக வேண்டுமென்பதும் இல்லை.

தொப்பூல்வழி X புலன் ஊடக வழி வளரும் ஈருடல் தன்மை மற்றும் எந்திரங்களுக்கான கடவுச்சொல் சேமிப்பறையாய் மாறி இயங்கும் நியுரான் உலகம்.ஒரே பற்பசையை, மருந்துகளை ,நோய்களை, ஆணுறைகளை கொண்ட குளோனிங் மனித சமூகத்தின் அறிபிம்பங்களாய் சீருடைத்தன்மையுள்ள கவிதைகள் உப்பு நீர் முதலையின் செதிலெங்கும். ரிச்சர்ட் டட்டில் – ன் ஓவியங்களை அணுகும் அதிகவனத்துடன் தொகுப்பின் ஓவியங்களையும் உள்வாங்கப் பணிக்கிறது நேர்த்தி

தோற்ற மயக்கங்களும் ,காட்சிப் பிழைகளின் ஒளிவிலகல் சித்திரங்கள் மீதும் புனையப் பெறும் கவிதைகளின் ஊடக வெளியை மறுத்து வர்மப் புள்ளியறிந்த அக்குபஞ்சர் ஊசிகள் செருகப் பட்ட உடலமாய் சல்லித்த சொற்களுடன் இருக்கிறது முதலை நீந்தும் தவிட்டு நிற மணலின் கோடுகள்.தனதேயான மொழிச் செறிவுடன் தொடர்ந்து இயங்கி வரும் கவனத்திற்குரிய இந்த தொகுப்பின் மூலம் புதியவெளிகளை கண்டறியும் வாசகனுக்கும் உரையாடலைப் பகிர்வோம் .

இளங்கோ கிருஷ்ணன்

2011-05-09T08:29:00.000-07:00

நரனின் மீபொருண்மைவெளி - உப்பு நீர் முதலையுடன் ஒரு பயணம்

யாருமற்ற இடத்தில்
என்ன நடக்கிறது
எல்லாம்

நகுலனின் இந்த நவீன மீபொருண்மை கவிதையோடு இக்கட்டுரை துவங்குவது பொருத்தமாக இருக்கும் என நான் கருதுகிறேன். மீபொருண்மை என்ற சொல் இந்தக் கட்டுரையில் Metaphysics என்ற சொல்லின் தமிழாக்கமாக பயன்படுத்தப்படுகிறது. கிரேக்கத்தில் மெட்டா எனும் சொல்லிற்கு beyond (கடந்த) என்று பொருள் மெட்டாபிசிக்ஸ் என்பதை பெளதீகம் கடந்தது என்று தோராயமாக மொழிபெயர்க்கலாம். வரலாற்றின் துவக்க காலம் முதலே மீபொருண்மையியல் என்ற துறையானது தத்துவத்தின் ஒரு பகுதியாக இருந்து வந்திருக்கிறது. பொருட்கள் அல்லது விஷயங்கள் எனப்படும் மேட்டர்ஸ் என்பதின் இருத்தல் குறித்தும் அதன் காரணங்கள் குறித்தும் அதன் பெளதீக இருப்பைப் கடந்து ஆராயும் ஒரு துறையாக மீபொருண்மையியல் இருந்து வருகிறது. நாம் வாழும் இந்தப் பிரபஞ்சம் மானுட சேதன அறிவுக்கு அப்பாற்பட்டவகையில் சிக்கலானதாகவும், நுட்பமானதாகவும், ஒன்றோடொன்று தொடர்பற்றும் வேறு ஏதேனும் ஒருவகையில் தொடர்புடையதாகவும் இருப்பதாக மனித மனம் எண்ணிய கணத்தில் மீபொருண்மை பார்வைக்கான தேவை தோன்றியிருக்க கூடும்.

எந்தப் பண்பாடாக இருந்தாலும் மீபொருண்மை கோட்பாட்டுகான தரிசனம் என்பது ஒரு படிமமாகவே தோன்றியிருப்பதற்கான சாத்தியம் அதிகம். அப்படிப் பார்க்கும் போது மீபொருண்மை என்ற கோட்பாட்டு உருவாக்கத்திற்கான கருவியாக கவிதையே எப்போதும் இருந்து வந்திருக்கிறது.

மேலே குறிப்பிட்ட நகுலனின் கவிதையை நவீன மீபொருண்மை கவிதை என்று நாம் சொல்வோமாயின் செவ்வியல் மீபொருண்மை என ஏதாவது உள்ளதா என்கிற கேள்வி இயல்பாக எழுகிறது. மீபொருண்மை பார்வை என்பது எந்த ஒரு குறிப்பிட்ட பண்பாட்டிற்கு மட்டும் சொந்தமானதல்ல. அது வரலாற்றின் துவக்ககாலம் முதலே எல்லா பண்பாட்டிலும் இருந்து வருகிறது. இன்னும் சொல்லப்போனால் மனம் முழுதாய் சமைந்த எந்த ஒரு தொல்குடி சமூகத்திலும் மீபொருண்மை பார்வைதான் அதன் அடிப்படையான பண்பாட்டுக் கட்டமைப்புகளையே உருவாக்கியிருக்க கூடும் என்றே நாம் சொல்லிவிட முடியும்.

மேற்கில் மிகத்துவக்கத்தில் மீபொருண்மையியல் பேரளவில் தனிமனித ஆன்மீக சாதனைகளோடு தொடர்புடையதாகவே இருந்தது. அதனால் அது தவிர்க்கவியலாமல் மதங்களோடும் கடவுள்சார் கோட்பாடுகளோடும் அடையாளம் காணப்பட்டது. 17ம் நூற்றாண்டில் நவீனத்துவத்தின் வருகையும் தத்துவதளத்தில் தெகார்தேவின் கார்டீசிய ஆய்வுமுறைகளின் ஆதிக்கமும் மீபொருண்மையியலின் மீது கடுமையான தாக்குதலை ஏற்படுத்தின. பொருள் கடந்த உண்மை என்ற கோட்பாட்டை ஏற்க மறுத்த பொருள் முதல்வாதிகளின் நூற்றாண்டாக அது இருந்தது. தொடர்ந்து வந்த 18, 19ம் நூற்றாண்டுகளில் பொருள்முதல்வாதிகளின் ஆதிக்கம் நீடித்த போதும் மீபொருண்மை சிந்தனைகள் மெல்ல நகர்ந்து புறவயமான அறிவியல் சிந்தனைகளை உள்வாங்கிக் கொண்டு தம்மை வளர்த்துக் கொண்டன. ஹெகல், காண்ட், நீட்ஷே போன்ற சிந்தனையாளர்கள் இதைச் செய்தார்கள். இதைத் தொடர்ந்து பிரபஞ்ச மையம் என்ற இடத்தில் கடவுளை நீக்கி விட்டு இயற்கையை முன்வைத்த எமர்சன், தோரோ போன்ற சிந்தனையாளர்கள் வந்தார்கள். இதன் பிறகு உருவாகி வந்த மீபொருண்மை சிந்தனைகளையே நாம் நவீன மீபொருண்மையியல் என்கிறோம். நவீன மீபொருண்மை சிந்தனைக்கு மதத்தோடும் கடவுளோடும் நேரடியான உறவு என எதுவுமில்லை. அது விஞ்ஞான நிருபணவாதத்தை ஒரு எல்லை வரை ஏற்றுக் கொண்டு இறுதி உண்மையை நோக்கி நகர்கிற ஒரு பயணமாக உள்ளது. நவீன மீபொருண்மையியலாளர் என்கிற பதத்திற்கு ஜே.கிருஷ்ணமூர்த்தி எனக்கு உடனடியாக தோன்றுகிற ஒரு சிறந்த உதாரணம்.

ஹெய்டெக்கர் ”மீபொருண்மை ஒரு அறிமுகம்” என்று ஒரு நூல் எழுதியிருக்கிறார். அவரும் அவரின் சகாவான சார்த்தரும் இருத்தலியம் பேசியவர்கள் அதாவது இருத்தலின் அபத்தம் பேசியவர்கள் என்ற வகையில் மீபொருண்மை சிந்தனைகளுக்கு எதிரானவர்கள் என்பது போல தோன்றினாலும் ஒருவகையில் அவர்கள் மீபொருண்மையியலை வேறு ஒரு கோணத்தில் அணுகியவர்கள் என்றே கொள்ள வேண்டும்.

சசூரின் நவீன மொழியியல் கோட்பாடுகள் அமைப்பியலாக வளர்ந்த போது அது மீபொருண்மையியலை கடுமையாக நிராகரித்தது. தொடர்ந்து வந்த பின் நவீனத்துவ சிந்தனைகளும் மீபொருண்மையியலை ஒரு பெருங்கதையாடல் எத்தனம் என நிராகரிக்கிறது. ஆனால் வேறொரு புறம் பகுத்தறிவின் வன்முறையைப் பேசும் அது வேறு பல நுட்பமான மற்றும் சிக்கலான மீபொருண்மை தளங்களை உருவாக்கிய படியே முன்னேறுகிறது என்ற வகையில் நவீன மீபொருண்மையியலின் சமகால சவால்களையும் சாத்தியங்களையும் வாசகர்களின் கணிப்புக்கு விட்டு விட்டு தமிழ் நவீன மீபொருண்மை கவிதைகளைப் பற்றி சுருக்கமாக பார்க்கலாம். அது நவீன கவிதைப் பரப்பில் நரனின் இடம் எது என நாம் கணிக்க உதவக்கூடும்.

தமிழ் நவீன கவிதை இயக்கத்தில் மீபொருண்மைக் கூறுகள் கொண்ட கவிதைகள் அதன் துவக்க முதலே எழுதப்பட்டு வருகின்றன. தமிழின் முதல் புதுக்கவிதையாளரான பிச்சமூர்த்தி கவிதைகளிலேயே மீபொருண்மை கூறுகள் நிறைய உண்டு. தமிழில் இவ்வகைக் கவிதை எழுதுபவர்களை புறவயமான ஆன்மீகத் தேட்டம் கொண்ட மீப்பொருண்மையாளர்கள் மற்றும் ஆன்மீக தேட்டம் உள் ஒடுங்கிய நிலையில் எழுதும் மீபொருண்மையாளர்கள் என இரண்டு பெரும் பிரிவுகளாக பிரிக்கலாம். புறவயமான ஆன்மீகத் தேட்டம் கொண்ட மீபொருண்மையாளர்கள் என பிச்சமூர்த்தி, பிரமிள், தேவதேவன் போன்றவர்களை கொள்வோம் எனில் உள் ஒடுங்கிய ஆன்மீகத் தேட்டம் கொண்ட மீபொருண்மையாளர்கள் என சி.மணி, நகுலன், ஆனந்த், தேவதச்சன், எம்.யுவன், குவளைக்கண்ணன் போன்றவர்களைச் சொல்லலாம். இந்தப் பட்டியல்களில் ஒருசில விடுபடல்களும் இருக்கக்கூடும். மேலும் இந்தப் பட்டியலில் குறிப்பிடப்பட்டிருக்கும் கவிஞர்களை மீபொருண்மையியல் என்ற தர்க்க எல்லைக்குள் மட்டுமே அடக்கிவிட முடியாது என்பதையும் சொல்லிக் கொள்கிறேன். இவர்கள் அனைவரும் குறிப்பிடத்தக்க எண்ணிக்கையில் மீபொருண்மையியல் கவிதைகளும் எழுதியிருக்கிறார்கள் என்றே நான் குறிப்பிட விரும்புகிறேன். விமர்சகன் எப்போதும் தன் தர்கத்தின் வழியாக கறாரான சில எல்லைகளை வகுத்துக்கொள்ளவே விரும்புகிறான். கவிஞனோ எந்தக் கறாரான எல்லைகளையும் கடந்து செல்லவே எப்போதும் விரும்புகிறான்.

இப்போது நாம் விவாதிக்க வேண்டியது இந்த இரண்டு பிரிவுகளுக்குமான வித்யாசம் என்ன என்பதையே. நான் ஏற்கனவே குறிப்பிட்ட படி நவீன காலத்திற்கு பின் கார்டீசிய ஆய்வின் அடிப்படையிலான அறிவியல் சிந்தனைகளை உள்வாங்கிக் கொண்டு மீபொருண்மையியல் செயல்படத் துவங்கிய போது மீபொருண்மையாளர்களிடம் இந்த இரண்டு வகையான போக்கு இயக்கம் பெறத்துவங்கியது. அதாவது இவர்களில் சிலர் மரபான இறையியல் அல்லது மெய்யியல் சிந்தனைகளை கைவிடாமலேயே நவீன அறிவியலின் சிந்தனைப் போக்குகளை உள்வாங்கியபடி அதை வளர்த்தெடுக்கத் தலைபட்டார்கள். பிரமிளின் e=mc2, மற்றும் தெற்கு வாசல் போன்ற கவிதைகளை இதற்கு உதாரணமாக சொல்லலாம். முதல் கவிதையான e=mc2, சக்தி என்ற கருத்தாக்கம் தொடர்பான மரபான சிந்தனைப் போக்கும் ஐன்ஸ்டைனின் சக்தி கோட்பாடும் சந்திக்க நேர்ந்த புள்ளியைப் பேசுகிறது எனில் காலம் மற்றும் வெளி குறித்த நவீன அறிவியலின் உரையாடல்களும் காலபைரவன் என்கிற மரபான தொன்மமும் சந்தித்தித்துக் கொள்ளும் புள்ளியில் இரண்டாவது கவிதை நிகழ்கிறது.

இதன் மறுபுறம் நவீன அறிவியல் கோட்பாடுகள் கொடுத்த பிரக்ஞை வழியாக நிகழச் சாத்தியமான மீபொருண்மைக் கவிதைகளை மட்டும் எழுதியவர்கள் என இரண்டாம் வகை மீபொருண்மையாளர்களை கொள்ளலாம். இதற்கு உதரணமாக எம்.யுவனின் வேறொரு காலம் என்ற தொகுப்பில் உள்ள கவிதைகளையும் ஆனந்தின் கவிதைகளையும் சொல்லலாம். காலம் மற்றும் வெளி தொடர்பான மீபொருண்மை உரையாடல்களை ஒரு மழலையின் வியப்புணர்வோடும் புரியாதவனின் திகைப்போடும் பேசுகின்றன இவ்விருவரின் இவ்வகைக் கவிதைகள்.

இவ்விரு வகை மீபொருண்மையாளர்களில் நரன் எவ்வகையைச் சேர்ந்தவர் என்பதை நாம் பொறுத்திருந்துதான் நோக்க வேண்டும். அவரின் இரண்டாவது கவிதைத் தொகுப்பான இந்நூலில் இவ்விருவகைக்குமே சாத்தியமான கவிதைகள் நிறைந்திருக்கின்றன.

முதல் வகைக்கு ஒரு கவிதையை நோக்குவோம்:

பேரமைதி

பேரமைதி
நீரினடியில் ஓராயிரம் மீன்கள்
நீந்திக் கொண்டுதானிருக்கின்றன
காலை மாற்றி வைக்கும் கொக்கால்
குளம் முழுக்கச் சலனம்
வட்ட வட்டமாய்
விரிந்து...விரிந்து..
குறுகி...குறுகி..
நீரினடியில் அலகை நுழைத்து
ஓராயிரம் மீனில் ஒரு மீனைக் கவ்விப் பிடிக்கையில்
துள்ளும் மீன்
துள்ளி..துள்ளி
நீரின் மேல் தெரியும் அகன்ற வெளியை
சலனப்படுத்துகிறது
விரிந்த
சலனத்திற்கும்
குறுகி நீண்ட பேரமைதிக்குமிடையே
ஒரு

தா ம ரைத்

த
ண்
டு

புத்தனிடமும் ஒரு குளமிருந்தது
அதற்குள் ஓராயிரம் மீன்கள்
ஓராயிரம் தாமரைகள்
ஓராயிரம் கொக்குகள்

நீரற்ற நீரால்
தசையற்ற மீன்களால்
இதழ்களற்ற தாமரைகளால்
பறந்துவிட்ட கொக்குகளால்
நிரம்பியிருக்கிறது அக்குளம்
எப்போதும் வற்றாக் குளமது
அதில் சலனிக்காத நீர்

அது அவன் பேரமைதியில் மட்டுமே சலனிக்கிறது

புத்தனின் முகத்தைப் பார்
எவ்வளவு சலனம்
எவ்வளாவு பேரமைதி
இரண்டும் ஒன்றெனப் போல்

நரனின் மிகச் சிறந்த கவிதைகளில் இது ஒன்று. குளம் சலனமற்றதைப் போல் இருக்கிறது. ஆனால் ஆழத்தில் எண்ணற்ற சலனங்களால் ஆனது. மேற்புரம் ஒரு சலனம் நிகழ்கிறது. ஒரு கொக்கு அலகு நுழைத்து ஆழத்து சலனத்திலிருந்து ஒரு மீனைப் பிடித்து வெளியில் தலை உயர்த்தியதும் சலனமற்று இருந்த வெளி சலம்புகிறது. வெளி சலனத்தில் விரிய குளத்தின் மேற்புரம் அமைத்திக்கு குறுகி நீள்கிறது இரண்டிற்குமிடையே ஒரு தாமரைத் தண்டு. இதுவரை கவித்துமாக இருந்த கவிதை சட்டென சரிந்து தத்துவத்திற்குள் நுழைகிறது. கவிஞனின் தர்க்க மனம் விழித்துக் கொள்கிறது. கவிஞன் கவித்துவ பித்து நிலையிலிருந்து இறங்கி அடைந்த தரிசனத்தின் உணர்வை அறிவாக பேச முனைகிறான். புத்தனிடமும் ஒரு குளமிருந்தது அதற்குள் ஓராயிரம் மீன்கள் என துவங்கி சலனமும் பேரமைதியும் ஒன்றென்று சொல்லி முடிகிறது கவிதை.

இப்போது தெற்கு வாசல் என்ற பிரமிளின் கவிதையோடு இதனை நோக்குவோம். இரண்டுக்கும் கவித்துவ நிலையில் உள்ள ஒற்றுமை என்ன இரண்டுமே தத்துவார்த்த நிலையில் உள்ள கருத்தினை கவித்துவ போதத்தில் சொல்ல முயல்பவை. ஆனால் நரனின் கவிதையில் உள்ளதைப் போல பிரமிளின் கவிதையில் உணர்ச்சி சரிவு நிகழவில்லை. பிரமிளின் கவிதையில் தத்துவார்த்த போதம் கவித்துவ எழுச்சிக்கு ஒரு க்ரியா விசையாக இருந்து மொத்தக் கவிதையையும் உணர்வு பூர்வமாக செய்திருக்கிறது. நரனின் கவிதையில் கவித்துவ எழுச்சி ஒரு குறிப்பிட்ட எல்லைக்குப் பின் சட்டென வடிந்து போத மனத்திற்கு வந்து விடுகிறது.

இனி நரனின் இன்னொரு கவிதையைப் பார்ப்போம்

முதலை

உப்புநீர் முதலையொன்று துயில்கிறது

தலையை நீருக்குள்ளும்
உடலை வெண்மணலிலும்
கிடத்தியபடி
அப்போது அதனுடல்
கார்காலத்தில் தொடங்கி
கோடைகாலம்வரை நீண்டிருந்தது.

நீரில் பாதியும் மணலில் பாதியுமாய் கிடக்கும் முதலை ஒன்றைக் காட்சிப்படுத்தி வெண்மணலை கோடைகாலமாகவும் நீரைக் கார்காலமாகவும் உருவகித்துக் காட்டும் இக்கவிதை இடப்பொருண்மையை காலப்பொருண்மையாக பேசிக் காட்டுவதன் வழியாக காலவெளித் தொடர்மம் (Time and space Continioum) என்கிற கருத்து நிலையை வியப்புணர்வோடு சுட்டுகிறது.

மேற்கூறிய இரண்டு கவிதைகளும் இரண்டு வகையானவை. முதல் கவிதையில் உணர்ச்சி போதத்தில் சற்று சரிவிருந்தாலும் அதில் ஒரு ஆன்மீகத் தேட்டம் உள்ளது. மேலும் நீர் என்பது நினைவிலி மனதின் குறியீடு என நவீன உளவியல் சொல்கிறது என்ற புரிதலோடு வேறொரு வாசிப்பு செய்யும் போது இந்தக் கவிதையின் அர்த்த தளம் இன்னும் விரிகிறது.

இரண்டாவது கவிதையில் நவீன இயற்பியலின் எல்லைக்குள் மட்டுமே இயங்கச் சாத்தியமான கவித்துவம் செயல்படுகிறது. இப்படியாக நரன் இருவகை மீபொருண்மைக் கவிதைகளும் எழுதச் சாத்தியமானவராக இருக்கிறார்.

மேலும் நான் ஏற்கனவே குறிப்பிட்டது போல் நரனும் வெறும் மீபொருண்மைக் கவிதைகள் மட்டுமே எழுதபவர் அல்ல என்பதற்கு இந்தத் தொகுப்பிலேயே நிறைய உதாரணங்கள் உள்ளன. “உங்கள் பெயரென்ன?” , “உலகை அணுகுதல்” போன்ற எளிய மொழி விளையாட்டுகளால் ஆன கவிதைகளையும் எழுதுபவராக நரன் இருக்கிறார்.

வைஸ்ராய் மார்ஷலின் டைரிக்குறிப்பு என்ற கவிதை இந்தத் தொகுப்பில் உள்ள நல்ல கவிதைகளில் ஒன்று. அவரது மீபொருண்மையியல் கவிதைகளைத் தவிர அவர் இதைப் போன்ற கவிதைகளின் வழியாகத்தான் மிகச்சிறந்த கவிதைகளை நோக்கிச் செல்ல முடியும் என்று தோன்றுகிறது.

நரன் கவிதைகளின் மையம் என்ன? அல்லது நரன் என்ன மாதிரியான கவிதைகளை எழுத தொடர்ந்து வசீகரிக்கப்படுகிறார் அல்லது என்ன மாதிரியான விஷயங்கள் நரனுக்கு கவிதை எழுதுவதற்கான மன உந்தத்தை தருகிறது என்று பார்ப்போம்.

நரன் கவிதைகள் மற்றும் கவிதை எழுதும் முறை போன்றவற்றை தீர்மானிப்பவையாக ஐந்து காரணிகள் அமைந்திருப்பதாக நான் கருதுகிறேன்.

1. காலம் மற்றும் வெளி தொடர்பான சிந்தனைகள் அதாவது காலப் பொருண்மையில் நிகழும் ஒரு விஷயத்தை இடப் பொருண்மையில் சொல்லிப் பார்ப்பது இடப்பொருண்மையில் நிகழும் விஷயத்தைக் காலப்பொருண்மையில் சொல்லிப்பார்ப்பது.

2. நிலக் காட்சிகள், பொருட்கள் மற்றும் அதன் தோற்றம் போன்றவை குறித்து கண நேரம் மனதில் நிகழும் ஒரு குழப்பம், ஒரு தோற்ற மயக்கம் போன்ற உணர்வுகள்

3. சொற்களைக் கொண்டு நிகழ்த்திக் காட்டச் சாத்தியமான எளிய மொழி விளையாட்டுகள். உதாரணமாக இருள் எனும் கவிதை

4. எண்கள்,சொற்கள் போன்ற தர்க்க சாத்தியம் நிறைய உள்ள விஷயங்களை ஒன்றின் தர்க்க சாத்தியத்தை வேறொரு தர்க்க சாத்தியமாக மாற்றி விட்டும் கலைத்துப் போட்டும் நிகழ்த்தும் தர்க்க மாயங்கள் (Logico – Magic)

5. கவிதைக்கான மையப்படிமம் அல்லது கருத்தை ஒரு கவிதையாக விரித்து எழுதுதல்.
தமிழ் நவீன கவிதை வெளியில் நரனின் சிறப்பு இடம் என்ன என்று பார்க்கலாம். சமகால தமிழ் நவீன கவிதை என்பதன் மையவிசையாக எது உள்ளது அதனோடு நரனுக்கு உள்ள உறவென்ன என்று பார்த்தால் அந்தக் கேள்விக்கான பதில் கிடைக்கக்கூடும். சமகால நவீனக் கவிதையின் மைய விசையாக உள்ள எதனோடும் நரனின் கவிதைகளுக்கு எந்தத் தொடர்பும் இல்லை. குறிப்பாக நரனின் கவிதைகளில் அரசியல் நிலைபாடுகள் இல்லை. பெரும்பாலான நவீன கவிஞர்களின் கவிதைகளில் உள்ளதைப் போன்று இருத்தலின் சிக்கல்களால் ஆன அழுமூஞ்சித்தனம் இல்லை.

நடன ஒத்திகை என்ற கவிதையும் ஷீ வின் வார்த்தைகளை கா பேசினாள் என்ற கவிதையும் வழக்கமான நரன் பாணியிலான கவிதைகள்தான் என்ற போதும் அந்தக் கவிதைகள் இயங்குகிற வாழ்வியல் வெளி அதை வழக்கமான நரன் கவிதைகள் என்ற தளத்திலிருந்து வேறொரு அனுபவதளத்திற்கு எடுத்துச் செல்கின்றன. நரனின் கவிதைகளில் எங்காவது கொஞ்சம் ஒரு விசும்பல் இருக்குமானால் அது இந்தக் கவிதைகளில் மட்டுமே.

மற்றபடி நம் சூழலில் உள்ள கொந்தளிப்பான வெக்கைக் கவிதைகளுக்கு நடுவே நரனின் கவிதைகள் மிகுந்த குளிர்ச்சித் தன்மை நிரம்பியவையாக உள்ளன. சுகுமாரன் பின் அட்டையில் சொல்லியிருப்பதைப் போல கபடமற்ற மழலை வியப்பையும் குளிர்ச்சியான புன்னகை ததும்பும் தியான மனநிலையையும் தமிழ் கவிதை வெளியின் மேல் பரப்பியபடி இருக்கின்றன நரனின் கவிதைகள். இதனாலேயே நரனை நான் நம் சமகாலச் சூழலின் புறநடைக் கவிஞன் என்று கூறுவேன். உண்மையில் இதுவே அவரது பலம் மற்றும் பலவீனம் இரண்டும்.

''உப்புநீர் முதலை '

2010-12-31T07:50:00.001-08:00

கவிஞர் .இசை

நண்பர்களே , அனைவருக்கும் இனிய புத்தாண்டு வாழ்த்துக்கள் . என் கவிதை
தொகுப்பு ''உப்புநீர் முதலை '' காலச்சுவடு பதிப்பகத்தில் வர இருக்கிறது
.வரும் புத்தக கண்காட்சியில் ஜனவரி 6 ,2011மாலை 6மணி காலச்சுவடு அரங்கில்
(f43)
நூலை எனது ஆருயிர் நண்பன் கவிஞர் .இசை வெளிடுகிறார் .

அந்த கணத்தில்
எனது நண்பர்கள் அனைவரும் என அருகில் இருக்க வேண்டுமென்பது எனது
விருப்பமும் ஆசையும்.நிச்சயமாக தங்களின் வரவை அன்புடன் எதிர்பார்க்கிறேன்
அன்பின்
நரன்

ஷீ ...ன் வார்த்தைகளை கா.... பேசினாள்

2010-11-18T03:48:00.000-08:00

காலை வணக்கம் ஐயா,
எங்கள் வங்கியிலிருந்து தங்களுக்கு
கடன் அட்டை வழங்குகிறோம் .
நீங்கள் விருப்பமாயிருக்கிறீர்களா ?
இனிய மென்மையான குரலில் வினவினாள். காவ்யா
இரண்டு மாதமாக
தங்களின் கடனட்டை தொகை செலுத்தப்படவில்லை
தொகையை வட்டியோடும், அபராதத்தோடும்
உடனே செலுத்துங்கள் .
காட்டமான குரலில் பேசினாள்.ஷீலா ப்ரியதர்ஷன்
ஷீ ...விடுமுறையில் போயிருந்தாள்
கா ...வை அவளிடத்தில் அமர வைத்தார்கள் .
ஷீ ...யின் வார்த்தைகளை கா .... பேசினாள்.
இனிய மென்மையான குரலில்
பொம்மை துப்பாக்கியால்
சுட்டுடுவன் ....சுட்டு ....டு...வேனென
தந்தையை மிரட்டும் 4வயது பெண் குழந்தையின்
குரல் போலிருந்தது

உங்கள் பெயரென்ன ?

2010-11-18T03:33:00.000-08:00

உங்கள் பெயரென்ன ?
------------------------------

றுகாற்,ம்கங்சி
எழுத்துக்களை மாற்றிப்போட்டு
விளையாடும் விளையாட்டை வகுப்பறையில்
விளையாடிக்கொண்டிருந்தார்கள்.
சிங்கத்தின் பின்பக்கத்தில் தலையும்
முன்பக்கத்தில் வாலுமிருந்தது .
வேறொருவன் சிங்கமென்ற
வார்த்தையை நேர்படுத்தி
அதன் உடலை சரிசெய்தான் .

அடுத்த அறையில்
தலையை கீழே ஊன்றி
காலை வான்நோக்கி வைத்தபடி
சிரசாசனம் செய்து கொண்டிருந்தாள்.
3வது படிக்கும் சிறுமி .

ரா
த்
வி
ப

வகுப்பறையின் வெளியே
வீட்டுப்பாடம் செய்யாமல் எழாவதுப்படிக்கும்
செ
ந்
தி
ல்
ர்மாகு
முழந்தாலிட்டு அமர்ந்திருந்தான் .

உணவு இடைவேளையில்
தேநீர் கடையில்
நான் இடதுகாலின் மேல்
வலது காலை போட்டு அமர்ந்திருந்தேன் .
எல்லோரும் ஓடினார்கள்.
ரயிலில் அடிபட்டு சிதறி கிடந்தவளின்
பெயர் .

கி மு

ண ர்

சொ
அவளின் கடைவாயில் ஒரு "ஈ".
நான் அருகில் வந்ததும்
பறக்க துவங்க்கி விட்டது .
நேராய்,
தலை கீழாய்,
கிடை மட்டமாய் ,
இடவலமாய் .....எப்படியெல்லாமோ
எப்படி பறந்தாலும் அந்த
"ஈ" - யின் பெயர்
அப்படியேயிருக்கிறது.
(குறிப்பு:-படுத்து கால்களை நீட்டி சாவாசன நிலையில் எனது பெயர் .நரன் )

உலகை அணுகுதல்
----------------------------

15வயதில் மதிய நேர
அறிவியல் வகுப்பிற்கு
ஆசிரியர் கொண்டு வந்தார்.
"U"வடிவ சோதனை குழாய் என்ற வார்த்தையை
புதியதாய் இருந்தது. அந்த வார்த்தை

அன்றிலிருந்து எழுத்துக்களை கொண்டு
உலகை அணுகத் துவங்கினன் .

கிராமத்தில் தாத்தா இறந்து விட்டார் .
அவரை குளிப்பாட்டி "h"வடிவ நாற்காலியில்
அமர வைத்திருந்தார்கள் .
அருகில் அவரின் தலைகீழ் "J "வடிவ கைத்தடியுமிருந்தது
நேரமாகி விட்டது .
தாத்தாவை எடுத்துப் போய் "H"வடிவ பாடையில்
கிடத்தினார்கள் .

அம்மா தலை விரி கோலமாயிருந்தாள் .
நீண்ட தலை முடியை அள்ளி "O"வாக்கி,
அதன் நுனி முடியை எடுத்து வெளியே விட்டு
"Q"வாக்கினாள்.

முடிவெட்ட கிளம்பினேன்.
வீடுகளின் நடுவேயிருக்கும் சந்தில்
ஒரு பெண்
சேலையை முழங்கால் வரை தூக்கி பிடித்து
''A"போல் நின்றபடி சிறு நீர் கழித்துக்கொண்டிருந்தாள் .
வழியில் சிறுவர்களிருவர் "V"வடிவ கவணில்
ஓனானை குறிபார்த்து க்கொண்டிருந்தார்கள் .

கடையில் முடி திருத்துநர்
"E''வடிவ சீப்பால்
தலை வாரி விட்டபடியே
தலை கீழ் ''Y''வடிவ கத்திரியால்
X,Y
X,Y யென மாற்றி மாற்றி வெட்டி கொண்டிருந்தார் .
அங்கே "ப" வடிவ மீன் தொட்டியொன்றில்
தங்க நிற
o
O
மீன்கள் O

வாக முட்டையிட்டு கொண்டிருந்தன.

Naran photography

2010-09-28T23:53:00.000-07:00

Naran photography

2010-09-28T23:50:00.000-07:00

naran paintings

2010-09-25T05:02:00.000-07:00

naran paintings

2010-09-25T04:59:00.000-07:00

கவிதை

2010-09-07T09:02:00.000-07:00

முதலை

------------

உப்புநீர் முதலையொன்று துயில்கிறது.

தலையை நீருக்குள்ளும் ,
உடலை வெண்மணலிலும்
கிடத்தியபடி
அப்போது அதனுடல்
கார்காலத்தில் துவங்கி
கோடைகாலம் வரை நீண்டிருந்தது .

கொக்குகள்
------------
வெந்நிற கொக்குகள்
பறந்தபடியிருகின்றன .
உயர ...உயர
மிகமிக உயர
இப்போது
வெந்நிற மேகங்கள்
பறந்தபடியிருகின்றன .
இறக்கைகளை அசைத்தபடி
தத்தம் கால்களை மடக்கியபடி.

தார்சாலைகள் ,வெந்நிற கோடுகள்

------------------------------------------

வனங்களின் நடுவே

போடப்பட்ட தார்சாலைகள்
அதன் நடுவே
வலப்புறத்தையும் ,
இடப்புறத்தையும்
பிரித்துச் செல்லும்
வெந்நிறக் கோடுகள்
எப்போதும் அதன் மேலேறி நடந்து செல்கின்றன .
சில வரிக்குதிரைகள்
வரிகுதிரையின் மேலேறிச் செல்கின்றன . சில
தார்சாலைகள் ,சில வெந்நிற கோடுகள்

நடன ஒத்திகை

--------------------
37,38 யென
கடந்து கொண்டிருந்தது வயது .
முந்தைய நாள்
பள்ளி ஆண்டுவிழாவிற்கென
நடன ஒத்திகை பார்த்துக் கொண்டிருந்த
பதினொன்றாவது படிக்கும் மகள்
காலையில் பள்ளிக்குப் போனதும்
வீட்டில் யாரும் இல்லை
அப்பாடலை ஒலிக்க விடுகிறாள் .
தன் மகளை போலவே
உடலை அசைத்து அசைத்துச் சுழலுகிறாள்.

அழைப்பு மணியை யாரோ அடிக்கும்
ஓசை கேட்டதும்
வெளியேறினாள் தன் 15வயதிலிருந்து .

கற்களின் சாயல்
---------------------

எல்லா கற்களிலும்

ஏதோ உருவமொன்றின்
சாயல் தெரிகிறது .
இதுவரை அச்சாயல்கொண்ட
உருவங்களுக்கும் ,உங்களுக்குமான
சந்திப்புகள் நிகழ்ந்திருக்கவில்லை
இதுவரை
நீங்கள் சந்தித்த உருவங்களின்
சாயல் கொண்ட கற்கள்
வேறொருவனின் கைகளிலிருகின்றன .
இப்போது அவனுக்கான கற்கள் உங்களிடம்
இருப்பது போலவே .

பதிவேடு
-----------
பறவையொன்று
விட்டுச் சென்ற
சிறகொன்றையெடுத்துவந்து
உன் மைக்கூட்டில்
சொருகியிருக்கிறாய்
எப்போதேனும் சிறகுமுனையில்
மைதொட்டு உன் வாழ்க்கைக் குறிப்பை
எழுதி வைகிறாய்
உன் பதிவேடு காலியாயிருக்கிறது .
உன் குறிப்புகள் எப்போதும்
அந்தரத்தில் மிதந்தபடியிருக்கின்றன

உப்பளம்
------------
உப்பளத்தில் அமர்ந்து
அழுது கொண்டிருந்தாள்.
ஒருவன் அவள் அழுகையைப்
பிரித்துப்பிரித்து
பாத்திக்கட்டிக் கொண்டிருந்தான்.
சற்று தூரத்தில் நின்று கொண்டிருந்தன
அவள் அழுகையை
வெவ்வேறு ஊர்களுக்கு
ஏற்றிச் செல்லவிருக்கும்
லாரிகள் ....
லாரிகள் ....

பிரசவ வார்டு

---------------------

மருத்துவமனை பிரசவ வார்டில்
பரபரப்பாய் ஓடிக்கொண்டிருந்தன எறும்புகள்
ஈனும் வலியில்
"அம்...மா" வென அலறியது
பெண் எறும்பொன்று
அதே வார்டில்
பிள்ளைப் பெற்றிருந்தவளை
பார்க்க வந்திருந்தவர்கள்
எடுத்து வந்திருந்த பாட்டிலில்
ஹார்லிக்ஸை திருடிக்கொண்டிருந்தன
சில எறும்புகள்
பிள்ளைத்தாச்சிக்கென ...
பிள்ளைத்தாச்சிக்கென .

கவிதை

2010-08-18T00:41:00.000-07:00

மண்புழு
---------------

மலை சரிவில் புதைந்து
வளர்ந்த சேப்பங்கிழங்குகளை
மண்வெட்டியால் தோண்டியெடுக்கிறான் .
விவசாயி
கிழங்கின் அடியிலிருக்கும் மண்புழுவொன்று
வெட்டுப்பட்டு இரு துண்டாகி
கிழக்கிலொன்றும்,
மேற்கிலொன்றுமாய்
தனித்தனியே
பிரிந்து செல்கிறது அவ்வுடல்
சற்றுத்தள்ளி கடப்பாரையால்
பூமி துளைக்குமொருவன்
கிழக்கில் நகர்ந்த மண்புழுவை
இரு துண்டாக்குகிறான் .
அதன் இரு உடல்
தெற்கிலும் , வடக்கிலுமாக
நகர்ந்து செல்கிறது .
ஒரு உடல்
திசைகொரு உடலாய் ,
திசைகொரு உயிராய்....

பிரிந்து ,பிறந்து

பிறந்து,பிரிந்து

ஆனால் எல்லாம் சம வயதில் .

கவிதைகள்

2010-08-09T02:20:00.000-07:00

திரு .பெலிக்ஸ்
------------------------
பல்லுயர் படிம ஆராய்ச்சியாளரான 63வயது திரு .பெலிக்ஸிடம்
177ஆண்டுகள் பழமையான மது புட்டியொன்று கிடைத்தது .
அவரின் 23ம் வயதில்
பொலிவிய நாட்டு கடற்பயண நண்பனொருவன் அதை பரிசளித்தான் .
இதுவரைஅம்மதுவை 3முறை மட்டுமே அருந்தியிருகிறார்.திரு .பெலிக்ஸ்

24 ம் வயதில்
தன் காதலின் வெற்றிக்காய் ஒரு முறை
அப்போது அம்மது இனிப்பு சுவையுடையதாயிருந்தது

37வயதில் வாழ்வின் மீதான சளிப்பால்....
அப்போது அம்மது மிகுந்த புளிப்பு சுவையுடையதாயிருந்தது .

தன் 58வயதில் சீமாட்டி .மேரிபெலிக்ஸ் இறந்து நன்காம் நாளில்
அப்போது அம்மது மிகுந்த கசப்பு சுவையுடையதாயிருந்தது .

கால் பட்டிலிற்கும் குறைவாய் இருந்த அம்மதுவை
தன்80வது பிறந்த நாளில் அருந்த திட்டமிட்டிருந்தார் .
அப்போது வாழ்வின் வேறொரு புதிய சுவையை
தான் அறிவேனென நம்பிகொண்டிருந்தார் .
ஆனால் 63வயதில் இறந்துவிட்டார் .
மிச்சம் இருந்த மதுவைகுவளையில் ஊற்றி அளந்து பார்த்தோம் .
17ஆண்டுகள் மீதமிருந்தது . .

வைஸ்ராய் .மார்ஷலின் டைரிக்குறிப்பு -1
------------------------------------------

வைஸ்ராய் .மார்ஷலின் டைரி குறிப்பில்
1853 சூன் 7ம் திகதி
137 ம் பக்கம்.
கானக வேட்டையில் தாம் சுட்டு வீழ்த்திய
வங்கப்புலியொன்றின் குறிப்பு இருக்கிறது .
7வயது நிரம்பி இருக்கும் தருணத்தில் அது வீழ்த்தப்பட்டது .
கொல்கத்தா அருங்காட்சியகத்தில்
இப்பவும் வைஸ்ராயின் டைரி இருக்கிறது
இரண்டு அறைகள் தாண்டி
கீழே குறிப்புக்கள் ஒட்டப்பட்ட கண்ணாடி பேழைக்குள்
வரியேரிய அப்புலியின் உடல்
தைலம் பூசி பாதுகாக்கப்பட்டு வருகிறது .
டைரி குறிப்பின் சுட்டு வீழ்த்தப்படும் வரிகளுக்கு
இரண்டு வரிக்கு முன்னால்
உறுமலுடன் புலியின் உயிர் இன்னமும் இருக்கிறது .
வைஸ்ராயின் வேட்டையை புகழ்ந்துரைப்பவனையும்
முகத்திற்கு நேராய் வைத்து புகைபடம் எடுப்பவனையும்
பேழையை உடைத்து தாக்க நினைக்கிறது அப்புலி.
பலநூறு மைல்கள் தாண்டி
கானகத்திற்குள் அதன் எலும்புகளை வைத்து
பழங்குடியொருவன் தோலிசை கருவியொன்றை இசைக்கிறான்.
எலும்புகளற்ற புலியால் அசையாதபடிதான்
அசைய முடிகிறது .

2010-08-09T02:00:00.000-07:00

வைஸ்ராய் .மார்ஷலின் டைரிக்குறிப்பு -1
----------------------------------------------------------
வைஸ்ராய் .மார்ஷலின் டைரி குறிப்பில்

1853 சூன் 7ம் திகதி 137 ம் பக்கம்.

கானக வேட்டையில் தாம் சுட்டு வீழ்த்திய

வங்கப்புலியொன்றின் குறிப்பு இருக்கிறது .

7வயது நிரம்பி இருக்கும் தருணத்தில் அது வீழ்த்தப்பட்டது .

கொல்கத்தா அருங்காட்சியகத்தில்

இப்பவும் வைஸ்ராயின் டைரி இருக்கிறது

இரண்டு அறைகள் தாண்டி

கீழே குறிப்புக்கள் ஒட்டப்பட்ட கண்ணாடி பேழைக்குள்

வரியேரிய அப்புலியின் உடல்

தைலம் பூசி பாதுகாக்கப்பட்டு வருகிறது .

டைரி குறிப்பின் சுட்டு வீழ்த்தப்படும் வரிகளுக்கு

இரண்டு வரிக்கு முன்னால்

உறுமலுடன் புலியின் உயிர் இன்னமும் இருக்கிறது .

வைஸ்ராயின் வேட்டையை புகழ்ந்துரைப்பவனையும்

முகத்திற்கு நேராய் வைத்து புகைபடம் எடுப்பவனையும்

பேழையை உடைத்து தாக்க நினைக்கிறது அப்புலி.

பலநூறு மைல்கள் தாண்டி

கானகத்திற்குள் அதன் எலும்புகளை வைத்து

பழங்குடியொருவன் தோலிசை கருவியொன்றை இசைக்கிறான்.

எலும்புகளற்ற புலியால் அசையாதபடிதான்
அசைய முடிகிறது .

திரு .பெலிக்ஸ்

------------------------------
பல்லுயர் படிம ஆராய்ச்சியாளரான 63வயது திரு .பெலிக்ஸிடம்

177ஆண்டுகள் பழமையான மது புட்டியொன்று கிடைத்தது .

அவரின் 23ம் வயதில்

பொலிவிய நாட்டு கடற்பயண நண்பனொருவன்

அதை பரிசளித்தான் .]

இதுவரைஅம்மதுவை

3முறை மட்டுமே அருந்தியிருகிறார்.திரு .பெலிக்ஸ்

24 ம் வயதில் தன் காதலின் வெற்றிக்காய் ஒரு முறை

அப்போது அம்மது இனிப்பு சுவையுடையதாயிருந்தது

37வயதில் வாழ்வின் மீதான சளிப்பால்....

அப்போது அம்மது மிகுந்த புளிப்பு சுவையுடையதாயிருந்தது .

தன் 58வயதில்

சீமாட்டி .மேரிபெலிக்ஸ் இறந்து நன்காம் நாளில்

அப்போது அம்மது மிகுந்த கசப்பு சுவையுடையதாயிருந்தது

கால் பட்டிலிற்கும் குறைவாய் இருந்த அம்மதுவை

தன்80வது பிறந்த நாளில் அருந்த திட்டமிட்டிருந்தார் .

அப்போது வாழ்வின் வேறொரு புதிய சுவையை தான் அறிவேனென நம்பிகொண்டிருந்தார் .

ஆனால் 63வயதில் இறந்துவிட்டார் .

மிச்சம் இருந்த மதுவைகுவளையில் ஊற்றி அளந்து பார்த்தோம் .

17ஆண்டுகள் மீதமிருந்தது . .

2010-05-04T00:04:00.000-07:00

Naran@v.Arockiyasahayaraja

S.Arul jeyaseeli

naran invitation

2010-05-03T23:51:00.000-07:00

zen photography -Naran

2010-03-28T07:01:00.001-07:00

photography -Naran

2010-02-10T04:30:00.000-08:00

அரூப அன்னம்

2010-01-06T04:45:00.000-08:00

அரூப அன்னம்
----------------------------
நீரையும் ,பாலையும்
தனித்தனியே பிரித்துணரும்
அரூப அன்னமொன்று
காலையிலும் ,மாலையிலும்
பால்காரனின்
பால்வாளி தொங்க விடும்
சைக்கிள் ஹேண்டில்பாரில்
அமர்ந்து திரிகிறது அவனோடு .

ப. எண்.30 பு. எண் 32. வீட்டில்
நோயாளி கணவனுக்காய்
நெளிந்த அலுமினியப் பாத்திரத்தில்
கடன் சொல்லி பால் வாங்குகிறாள்
முதிய பெண்ணொருத்தி .

அடுத்த வீட்டில்
புது ரூபாய் தாளினை நீட்டி
புது சில்வர் பாத்திரத்தில்
சிரித்தபடி பால் வாங்குகிறாள்
புது பெண்ணொருத்தி .
கெட்டியான பூரிப்பு
நுரைத்து நிற்கிறது .
அவள் பாத்திரத்தில்

அலுமினிய பாத்திரத்திலிருந்து
பாலையும்
புது சில்வர் பாத்திரத்திலிருந்து
நீரையும்
பிரித்துணர முடியாமல் திணறுகிறது அன்னம் .

முன்பாக பால்காரன் அன்னமாகி
அலுமினிய பாத்திரங்களுக்கும்
புது சில்வர் பாத்திரங்களுக்கும்
வெவ்வேறு வாளிகளில்
பாலை பிரித்து நிரப்புகிறான் தினமும் .

இப்போது சீட்டிலும்,
ஹேண்டில்பாரிலும்
இரண்டு அன்னப்பறவைகள்
சைக்கிளில்
வெவ்வேறு வீடுகளை தேடி அலைகின்றன
வெவ்வேறு வீதிகளில் .

நரன் ஓவியங்கள்

2009-09-09T08:31:00.000-07:00

நரன் ஓவியம்

2009-08-22T02:53:00.000-07:00

புகைப்பட ,மற்றும் ஓவிய கண்காட்சி

2009-08-22T02:08:00.000-07:00

இந்தியமரபு ஓவியமீட்டெடுப்பின் மிக முக்கிய ஆளுமை K.T.காந்திராஜன் .
ஓவியர் , கலை வரலாற்று ஆய்வாளர்,தொல்பொருள் கண்டறிவாளர்.
இந்தியாவின் மலைபகுதிகளிலும் , கோவில் நகரங்களிலும் ,குகை புறங்களிலும் சுற்றி அலைந்து
அங்கிருக்கும் சுவரோவியங்களையும் , பாறை ஓவியங்களையும் ,ஆதி பழங்குடி ஓவியங்களையும் ,
நிறைய மீட்டெடுப்பு செய்திருக்கிறார் .அவற்றை ஒரு குறும்படமாகவும் பதிவு செய்து கொண்டிருக்கிறார் .தற்பொழுதுமதுரையில் நடக்கவிருக்கும் புத்தக கண்காட்சி வளாகத்தில் "நான் மாட கூடல் " அரங்கில்
அவரின் ஒருங்கிணைப்பில் புகைப்பட ,மற்றும் ஓவிய கண்காட்சி நடக்கவிருக்கிறது .
தமிழ் ஓவியம் மற்றும் மரபு சூழலில் இது ஒரு முக்கிய நிகழ்வாகும் .
அனைவரும் தவறாது கலந்து கொள்ளுங்கள் .

- அன்புடன்

நரன்
www.narann.blogspot.com
K.T.காந்திராஜன்தொடர்புக்கு -9840166590
gandhirajan@yahoo.com

தமிழின் நேரடி ஜென் கவிதைகள் -நரன்

2009-08-11T03:37:00.000-07:00

சுவரும் இல்லாமல்
ஆணியும் இல்லாமல்
பிடிமானமும் இல்லாமல்
தொங்குகிறது .கண்ணாடி
நீ சிரிக்கிறாய்
உன் எதிரில் இருப்பவனும்
சிரிக்கிறான்.

********
ஓய்ந்ன் அருந்திய
கோப்பையின் அடியில்
எஞ்சி இருக்கும்
நூற்றண்டுக்கு முந்திய்
திராட்சை கொடியின்
சிறு பகுதி .

*************.
கிளையை பிடித்து தொங்காதே.
கிட்டத்தட்ட
127 ஆண்டுகள் பழையது இந்த மரம் .
ஆனால் அதன் இலைகள் அப்படி இல்லை.

***********
குட்டி தவளைகள்
குட்டி பூச்சியை வுன்க்கிறது
குட்டியான வாயால்
குட்டியான சப்தங்களை
எழுப்புகின்றது .
தம் குட்டியான கால்களால்
குட்டியான வுயரத்தை
குட்டியான நீளத்தை
தாவுகின்றன .
பெரிய தவளைகளும் அப்படியே
யாவற்றிலும் பெரிய ....

********
அவன் சிலநேரம்
காற்றில் அப்படியும் இப்படியுமாய்
வாளை வீசும்போது
அம்மரத்திலிருந்து
ஓரிரு இலைகள் உதிர்கின்றன.

*****.
எதிர்பார்த்தல் எதுவுமின்றி
நூறாண்டுக்கு பின்வருபவர்களுக்கும்
உபயோகமாய் வாழத் தீர்மானித்தேன்
நூறாண்டுக்கும் முன்
யாரோ புதைத்து வைத்த
ஓயின் பீப்பாயை
மண்ணிலிருந்து
தோண்டி எடுக்கும் போது .

*****.
பச்சைநிற வயற்பரப்பிலிருந்து
பச்சைநிற துண்டு வயற்பரப்புகள்
ஆகாசம் நோக்கி பறக்கின்றன
வசந்த காலத்தின்
ஆயிரமாயிரம் வெட்டுக்கிளிகள் .

*****
கொஞ்சம் அரிசியையும்
கட்டு சுள்ளியையும்
கொடுத்து உதவினான் .
திரும்ப ஒரு புன்னகையை வழங்கினேன்
அவனுக்கு .
அது மட்டும் தான்
அது மட்டும் தான்
அளிக்க முடிந்தது
என்னால் அப்போதைக்கு .

*****
ஆறு மாதத்திற்கு பின்
இங்கே வந்திருக்கிறேன்
தியானத்திற்காய் .....
உதிர்ந்த இலைகள்
பொலிவிழந்த மரங்கள்
ஹோ .....
என் தியானம்
எப்படி கழியும் அமைதியுடன் .

*****
வனாந்திரத்தில்
உதிர்ந்த பூக்களை மிதித்தபடி
மரத்திலிருக்கும் பூக்களை
ரசித்து கொண்டிருக்காதே .
அதனதன் இயல்பிலிருக்கின்றன
பூக்கள் .

*****
வனத்தில் அமர்ந்து
சிறிது நெருப்பை
பற்ற வைத்தேன் .
மரங்கள் அவற்றை
தன் அருகிலிருக்கும்
துணைமரங்களுக்கு
கைமாற்றி விட்டு கொண்டிருந்தன .

*****
தொடர்ந்து இயற்கையை
அவதானித்துக் கொண்டிருந்தேன்....
.........தொடர்ந்து..
வயதாகி விட்டது .
என் மகனிடம்
கையளித்துவிட்டுசெல்கிறேன் .
மரங்களும் தன் பங்கிற்கு
கிளை மரங்களை எழுப்பியிருகின்றன .

*****.
என்னோடு
இந்த தியானவிரிப்பின்
மூலையில்
ஓர் எறும்பும் அமர்ந்திருக்கிறது
கண்களை மூடி
தியானிக்கத் துவங்கினேன் .
தியானம் இப்போது
மூலையிலிருந்து .
எறும்புகள் சாரைசாரையாய்
நகர்ந்து கொண்டிருந்தன
தியானத்தின் மேல் .

*****
தியானத்திற்குப்பின்
மூன்று துறவிகளும்
ஒரே கிணற்றுக்குள் இறங்கி குளித்தனர் .
குளித்து முடித்து
வெவ்வேறு கிணறுகளிலிருந்து
வெளியே வந்தனர் .
முதல் துறவி சொன்னார் .
நான் குளித்த கிணற்றில் பாசிபடர்ந்திருந்தது .
இரண்டாம் துறவி ........
நான் குளித்த கிணற்றில்
நீர் உப்பு கரித்தது.
மூன்றாம் ...........
நான் குளித்த கிணற்றில் 27தவளைகளும் ,
நீர் பாம்பொன்றும் இருந்ததென .
பின் ஒரே கிணற்றின் கரையில் நின்று
தத்தம் ஈர உடலை துடைத்துக்கொண்டனர்.

******
பனிப்பிரதேசத்தின் குளிர்காலை
ஏரியில் முழுக்க
நிரம்பியிருக்கின்றன கொக்குகள் .
உற்று நோக்குங்கள்
ஒரு கொக்குமில்லை .

*****
ஆரஞ்சு நிறம் குறைவாயிருக்கிறது .
கால்களை
நீருக்குள் அமிழ்த்தியிருக்கும்
கொக்குகளை வரைகிறான்

*****

நரன் ஓவியங்கள்

2009-08-11T03:23:00.001-07:00

-1-

-2-

-3-

உயிரோசை இதழ்-47ல் வெளியான கவிதை

2009-08-11T02:59:00.000-07:00

முதலை-

---------------------

நீர் தாவரத்தின்

இலையின் அடியில் ஊரும்

நீர் புழுவை விழுங்கும் மீனை

சற்றுகெல்லாம் கவ்விவிட்டது.

அக்கொக்கு.

கொக்கின் தொண்டைக்குள்

மீன் நீந்தி இறங்கி கொண்டிருக்கையில்

கொக்கின் கால்களை

பற்றி இழுக்கிறது ஏரி முதலையொன்று .

ஒரு குறியில் ,

ஒரு பாய்ச்சலில் ,

ஒரு வாயில் ,

ஊர்வன ,நீந்துவன ,பறப்பன - வென

அம்முதலை3 இறையை

கவ்விக் கொண்டிருக்கிறது

இப்போது .

நன்றி : "உயிரோசை "இதழ் .47

உயிர்மை ஜூலை'2009 இதழில் வெளியான எனது இரண்டு கவிதைகள்

2009-07-03T22:28:00.000-07:00

முயல்கள் ,கொக்குகள்
------------------------------
அரசு மருத்துவமனையின்
பழைய கட்டிட வராண்டாக்களில்
வெள்ளைநிற ஆடைகளை உடுத்தியபடி
தாதிகள் அங்கேயும் ,இங்கேயுமாய்
பரபரப்பாய் திரிகிறார்கள்
வெள்ளைநிற முயல்களை போல

எப்போதாவது மேலே வெந்நிற உடுப்போடும்
கீழே வேறு நிறமுடைய ஆடையோடும்
மருத்துவர்கள் வருகிறார்கள் , போகிறார்கள்
கையில் ஸ்டெதஸ்கோப்போடு
வெள்ளையாய் ,ஆரஞ்சு கால்களோடு
அலகில் குச்சிகளை கவ்வியபடி அலையும்
கொக்குகளைப் போல

பிரசவ வார்டிலிருந்து
முகம் மலர வெளியேறுகிறார்கள் தாதிகள்.
எப்போதாவது மருத்துவர்கள் .
கையில் வெந்நிற துணியால்
சுற்றிய குழந்தையோடு .
அப்போது முயல்கள் முயல் குட்டிகளோடு
கொக்குகள் குஞ்சுகளோடு
வெளிவருகின்றன
பிரசவவர்டில்லிருந்து .

விநோத பறவை
----------------------
வீட்டிற்குள் ஒரேயொரு சிறகுமட்டும் கிடந்தது .
எந்த பறவையினுடையது என்பதை
பொருத்திப் பார்க்க முடியவில்லை .
தியானத்தில் உறைந்திருக்கும் பொழுது
ஏதோவொரு பறவையின்
சப்தம் மட்டும் கேட்டுக் கொண்டேயிருந்தது .
வெளியே வந்துப் பார்த்தேன்
ஆகாயத்தின் உயரத்தில் இன்னதென அறியமுடியாத
ஒரேயொரு பறவை பறந்து கொண்டிருந்தது
உள்ளே மகள் 27ம் பக்கத்தில்
புள்ளிகளை இணைத்தால் கிடைக்கும்
உருவங்களைப் பற்றிய விளையாட்டொன்றை
பென்சிலால் விளையாடிக் கொண்டிருந்தாள்.
நானும் சிறகு ,சப்தம், பறத்தல் என்ற
மூன்று புள்ளிகளையும் இணைத்துப் பார்த்தேன் .
விநோதமான பறவையொன்று கிடைத்தது .
மகள் 73 ம் பக்கத்தில் விடையை சரிபார்த்தாள்
அவ்விநோத பறவையினத்தின்
முதல் பறவையிலிருந்து ,கடைசி பறவைவரை என்னிடமேயிருந்தது .
முதலுக்கும் ,கடைசிக்குமிடையே
அது எந்த முட்டையும் இடவில்லை .

உயிர்எழுத்து இதழ் 25 ல் வெளியான எனது இரண்டு கவிதைகள்

2009-07-03T22:07:00.000-07:00

ஊறுகாய் ஜாடி
-------------------
வீட்டில் பழமையான
ஊறுகாய் ஜாடியைப் போலிருந்த
பாட்டியென்ற வார்த்தை
உடைந்து போனது நேற்று .
அம்மா மாரடித்து அழுதாள் .
சிறிது காலத்திற்குப்பின்
அக்காவிற்கு குழந்தை பிறந்தது .
வேறொரு ஜாடியை
வாங்கிகொண்டுவந்து வைத்து போல
வீட்டில் மீண்டும்
பாட்டி என்ற வார்த்தை உருவானது .
மூன்று நாட்கள் இருந்துவிட்டு
அக்குழந்தை இறந்துவிட்டது .
இப்போது ஒரு குட்டிஜாடியும்
பெரியஜாடியும்
சேர்ந்தே உடைந்து போனது .

"க்ளிப்புகள்"
--------------
நீண்ட நைலான் கொடியில்
துணிகள் துவைத்து
உலர்த்தப் போட்டுக்கிடக்கிறது .
ஒட்டக நிறத்திலிருக்கும் மேலாடையையும்
அதன் இணைக்காய் கீழ் அணியும்
கருமந்தி நிறத்து "லீ" பிராண்ட் கால்சராயையும்
வெள்ளை வெளேரென்று
கொக்கின் நிறத்திலிருக்கும்
உள் பனியனையும் ,
கைகுட்டையையும் ,
முதலையின் வாயைப் போன்றிருக்கும்
"க்ளிப்புகள்" கவ்விக் கொண்டிருக்கின்றன.
அதே சமயத்தில்
துண்டுதுண்டாய் காயப்போட்டுக் கிடக்கும்
என் உடலையும்
அது ஒரு சேர கவ்விக்கொண்டிருகிறது.

ZEN POEM -NARAN

2009-06-20T02:17:00.000-07:00

THE CANNON'S MOUTH

22,Margaret Grove,

Harborne,

Birmingham B 17 9JH

UK.

"UK "விலிருந்து வெளிவரும் முக்கிய இலக்கிய இதழான "THE CANNON'S MOUTH "இதழில் வெளிவந்த எனது ஜென் கவிதையொன்று .

No walls

no nails

no fixture

glass is hanging

you smile

The man in front

is also smiling.

http://www.cannonpoets.co.uk/

zen poems

2009-06-20T01:45:00.000-07:00

இங்கலாந்திலிருந்து வெளிவரும் முக்கிய இலக்கிய இதழான "THE JOURNAL" இதழில் வெளிவந்த எனது ஜென் கவிதையொன்று .

THE JOURNAL-Last spring '2009

issue#26

zen poem by NARAN (india)

Tiny frogs
eat tiny insects

make tiny noise
with tiny mouth

jumps tiny heights
tiny lengths
with tiny legs.

Big frogs
are also same
everything
as big.

It being The Journal's raison d'être there are of course also poems in #26
- by Bruce Ackerley, Christopher Allan, Kevin Bamford, Lance Calabrese, Terri Brown-Davidson, Reid Bush, David Callin, Michael Ceraolo, Eleanor Clare, Holly Day, Peter Day, Chris Deakins, Kevin Densley, Deborah Gordon, Mark Leech, Gary Lehmann, Genista Lewes, Paul Murphy, Naran, W. Dale Nelson, Carlos Nogueiras, Thomas Ország-Land, Matthew Porubsky, Miklós Radnóti, M. A. Schaffner, Tate Sherman, Nigel Smith, Jayne Stanton, Jocelyne Thébault, Carol Thistlethwaite, J.S.Watts and F.J. Williams

http://www.freewebs.com/thesamsmith/index.htm#262567940

தமிழின் நேரடி ஜென் கவிதைகள்

2009-06-10T05:13:00.000-07:00

ஜென் கொக்குகள்

-----------------------

பனிப்பிரதேசத்தின்

குளிர்காலை

ஏரியில் முழுக்க நிரம்பியிருக்கின்றன

கொக்குகள் .

உற்று நோக்குங்கள்

ஒரு கொக்குமில்லை .

****************

ஆரஞ்சு நிறம்

குறைவாயிருக்கிறது .

கால்களை நீருக்குள்

அமிழ்த்தியிருக்கும்

கொக்குகளை வரைகிறான்.

உயிரோசை இதழ் 39 ல் வெளியான எனது கவிதை

2009-05-25T23:49:00.000-07:00

விண்ணப்பம்
----------------

மழையைப் பற்றியும்,

வெயிலைப் பற்றியும்

ஆய்வு மேற்கொள்பவன்

மிகுந்த மனஉளைச்சலுக்கு ஆளாகிறான் .

மழைப் பற்றிய தம் ஆய்வு முடிவுகளை

ஒரு மழை நாளில் நனைந்தபடியே

மேலதிகாரியிடம் கொண்டு வந்தான் .

அதனை கோப்பில் பத்திரப்படுத்த உத்தரவிட்டார் .

மேலதிகாரி

சில நாட்களுக்குப் பின்னர்

அக்கோப்பை எடுத்துப் பார்க்கையில்

மழை பற்றிய ஆய்வுக் குறிப்புகள் யாவும்

உலர்ந்து

வெறும் காகிதம் மட்டுமேயிருந்தது .

வெயில் பற்றிய அவனது ஆய்வுக் குறிப்புகளோடு

அலுவலகத்திற்குள்

அவன் நுழையத் துவங்கியதும்

வெயில் காணாமல் போய்

குறிப்புகளின் மேல்

நிழல் படியத் துவங்கி விடுகிறது .

பைத்தியத்தைப் போல கத்துகிறான் .

வெயிலுக்கும் ,மழைக்கும் நடுவே நின்று

ஒரு காகிதத்தை எடுத்து

மழை பற்றிய

ஆய்வுக் குறிப்புகளைச் சேகரிக்க

நீர்த்தொட்டியொன்றையும் ,

வெயில் பற்றிய

ஆய்வுக் குறிப்புகளைச் சேகரிக்க

மேல் கூரையற்ற

சிறிய அறையொன்றையும்

கட்டித்தருமாறும் அரசாங்கத்திடம் விண்ணப்பித்தான் .

காலச்சுவடு இதழ்108 ல் வெளியான எனது கவிதை

2009-05-23T00:36:00.000-07:00

நான்கு பேர்
-----------------
வேறொருவரைப் பார்க்கப் போயிருந்தேன்
வருவாரெனச் சொல்லி
நான்குபுறமும் கண்ணாடியால்
சூழ்ந்தஅறையொன்றில்
அமரவைத்தார்கள்.
உள்ளே என்னைப் போலவே
எல்லா திசைகளிலும்
ஒருவர் அமர்ந்திருந்தார்.
நடுவே அமர்ந்திருந்தஎன்னைப் பார்க்க
அவர் வந்தார் அறைக்கு
அவரைப் போலவேயிருக்கும்
நான்கு பேர் அவரோடு நுழைந்தார்கள் அறைக்குள்
நான் அவரோடு பேசிக்கொண்டிருந்தேன்
என்னை போலவேயிருக்கும் நான்கு பேர்
அவரைப் போலவேயிருக்கும்
நான்கு பேரோடுபேசிக்கொண்டிருந்தார்கள்.

உயிரோசை இதழ் 8 ல் வெளியான தமிழின் நேரடி ஜென் கவிதைகள் -நரன்

2009-05-22T22:53:00.000-07:00

1.அவன் சிலநேரம்

காற்றில்

அப்படியும் இப்படியுமாய்

வாளை வீசும்போது

அம்மரத்திலிருந்து

ஓரிரு இலைகள் உதிர்கின்றன.

*****
2.

எதிர்பார்த்தல் எதுவுமின்றி

நூறாண்டுக்குப்

பின்வருபவர்களுக்கும்

உபயோகமாய் வாழத் தீர்மானித்தேன் .

நூறாண்டுக்கும் முன்

யாரோ புதைத்து வைத்த

ஒயின் பீப்பாயை

மண்ணிலிருந்து

தோண்டி எடுக்கும் போது .

*****
3.

பச்சைநிற வயற்பரப்பிலிருந்து

பச்சைநிறத் துண்டு வயற்பரப்புகள்

ஆகாசம் நோக்கிப் பறக்கின்றன

வசந்த காலத்தின்

ஆயிரமாயிரம் வெட்டுக்கிளிகள் .

*****
4.

கொஞ்சம் அரிசியையும்

கட்டுச் சுள்ளியையும்

கொடுத்து உதவினான் .

திரும்ப ஒரு புன்னகையை வழங்கினேன்

அவனுக்கு .

அது மட்டும் தான்

அளிக்க முடிந்தது என்னால்

அப்போதைக்கு .

*****
5.

ஆறு மாதத்திற்குப் பின்

இங்கே வந்திருக்கிறேன்

தியானத்திற்காய் .....

உதிர்ந்த இலைகள்

பொலிவிழந்த மரங்கள்

ஹோ .....

என் தியானம் எப்படிக் கழியும்

அமைதியுடன் .

*****
6.

வனாந்திரத்தில்

உதிர்ந்த பூக்களை மிதித்தபடி

மரத்திலிருக்கும் பூக்களை

ரசித்துக் கொண்டிருக்காதே .

அதனதன்

இயல்பிலிருக்கின்றன பூக்கள் .

*****
7.

வனத்தில் அமர்ந்து

சிறிது நெருப்பைப் பற்ற வைத்தேன் .

மரங்கள்

அவற்றை தன் அருகிலிருக்கும்

துணைமரங்களுக்கு கைமாற்றி

விட்டுக் கொண்டிருந்தன .

*****
8.

தொடர்ந்து

இயற்கையை அவதானித்துக்

கொண்டிருந்தேன்....

.........தொடர்ந்து..

வயதாகி விட்டது .

என் மகனிடம்

கையளித்துவிட்டுசெல்கிறேன் .

மரங்களும்

தன் பங்கிற்கு

கிளை மரங்களை எழுப்பியிருக்கின்றன .

*****
9.

என்னோடு

இந்த தியானவிரிப்பின் மூலையில்

ஓர் எறும்பும் அமர்ந்திருக்கிறது .

கண்களை மூடிதியானிக்கத் துவங்கினேன்

தியானம் இப்போது மூலையிலிருந்து

எறும்புகள் சாரைசாரையாய்

நகர்ந்து கொண்டிருந்தன

தியானத்தின் மேல் .

*****
10.

தியானத்திற்குப்பின்

மூன்று துறவிகளும்

ஒரே கிணற்றுக்குள் இறங்கி குளித்தனர் .

குளித்து முடித்து

வெவ்வேறு கிணறுகளிலிருந்து வெளியே வந்தனர் .

முதல் துறவி சொன்னார் .

நான் குளித்த கிணற்றில் பாசிபடர்ந்திருந்தது .

இரண்டாம் துறவி ........

நான் குளித்த கிணற்றில் நீர் உப்பு கரித்தது.

மூன்றாம் ...........

நான் குளித்த கிணற்றில்

27தவளைகளும் ,

நீர்ப் பாம்பொன்றும் இருந்ததென .

பின் ஒரே கிணற்றின் கரையில் நின்று

தத்தம் ஈர உடலை துடைத்துக்கொண்டனர்.

உயிரோசை இதழ் 20 ல் வெளியான தமிழின் நேரடி ஜென் கவிதை -நரன்

2009-05-22T22:33:00.000-07:00

ஜென் வரிக்குதிரை

--------------------------

இரவையும் ,பகலையும் தன் உடலின் வழியே

ஒரே நேரத்தில் கடந்து செல்கிறது வரிக்குதிரை.

பியானோ கட்டைகளின் மேல் ஒரு வரிக்குதிரை

வரிக்குதிரையின் மேல் ஒரு பியானோக்கட்டை

நீண்ட புற்களிடை மேயும் வரிக்குதிரை

கருப்பு ,வெள்ளை மற்றும் பச்சை .

4 .

வரிக்குதிரையின் மேல் அரூப மனிதர்களிருவர்

செஸ் ஆடி கொண்டிருகிறார்கள் .

உயிர்மை இதழில் வெளியான எனது 2 கவிதைகள்

2009-05-22T05:08:00.000-07:00

ஆய்வறிக்கை

---------------------
வண்ணத்துப்பூச்சி ஆய்வாளர்

தன் ஆய்வின் முடிவை சமர்பித்தான்

1137 வண்ணத்துப்பூச்சியின் வகைகளையும்

அதன் வாழ்வியல் கூறுகளையும்

பகுப்பாய்வு செய்து

அவற்றின் புகைப்படங்களையும்

அதில் இணைத்திருந்தான்.

பெயரும், புகைப்படமும் இல்லாத

1138வது வண்ணத்துப்பூச்சியொன்றையும்

அவனுக்குத் தெரியும்.

அதை அவன் தன் 16 வயதில் பார்த்தான்

அதே வண்ணத்துப்பூச்சியை சமீராவும் பார்த்தாள்.

அப்போது அவளுக்கு வயது 14.

குட்டிக் குழந்தை

----------------------
4வயது குட்டிக் குழந்தை

மிகக்குட்டியான உடையை உடுத்துகிறது.

தன் குட்டியான பாதங்களால்

குட்டியான அடிகளை எடுத்து வைக்கிறது

இப்பிரபஞ்சத்தின் மீது.

33வயது தந்தையின்

மிகப்பெரிய பூட்சுகளை அணிந்தபடி

பெரிய பெரிய அடிகளை

எடுத்து வைக்கமுயல்கிறது.

தந்தையின் பெரிய கால்சராயை

அணிந்து கொள்கிறது.

இடுப்பில் நிற்காத அக்கால் சராய்

அவிழ்ந்து அவிழ்ந்து விழுகிறது.

33 வயதிலிருந்து

4வயதிற்கு.

உயிரெழுத்தில் வெளியான எனது 9 கவிதைகள் -(oct-2008)

2009-05-22T02:52:00.000-07:00

முதலை

----------

உப்புநீர் முதலையொன்று துயில்கிறது .

தலையை நீருக்குள்ளும் ,

உடலை வெண்மணலிலும்

கிடத்தியபடி

அப்போது அதனுடல்

கார்காலத்தில் துவங்கி

கோடைகாலம் வரை நீண்டிருந்தது .

கொக்குகள்

------------

வெந்நிற கொக்குகள்

பறந்தபடியிருகின்றன .

உயர ...உயர

மிகமிக உயர

இப்போது

வெந்நிற மேகங்கள்

பறந்தபடியிருகின்றன .

இறக்கைகளை அசைத்தபடி

தத்தம் கால்களை மடக்கியபடி.

தார்சாலைகள் ,வெந்நிற கோடுகள்

-------------------------------------------

வனங்களின் நடுவே

போடப்பட்ட தார்சாலைகள்

அதன் நடுவே

வலப்புறத்தையும் ,

இடப்புறத்தையும்

பிரித்துச் செல்லும்

வெந்நிறக் கோடுகள்

எப்போதும் அதன் மேலேறி நடந்து செல்கின்றன .

சில வரிக்குதிரைகள்

வரிகுதிரையின் மேலேறிச் செல்கின்றன . சில

தார்சாலைகள் ,சில வெந்நிற கோடுகள்

நடன ஒத்திகை

--------------------

37,38 யென

கடந்து கொண்டிருந்தது வயது .

முந்தைய நாள்

பள்ளி ஆண்டுவிழாவிற்கென

நடன ஒத்திகை பார்த்துக் கொண்டிருந்த

பதினொன்றாவது படிக்கும் மகள்

காலையில் பள்ளிக்குப் போனதும்

வீட்டில் யாரும் இல்லை

அப்பாடலை ஒலிக்க விடுகிறாள் .

தன் மகளை போலவே

உடலை அசைத்து அசைத்துச் சுழலுகிறாள்.

அழைப்பு மணியை யாரோ அடிக்கும்

ஓசை கேட்டதும்

வெளியேறினாள் தன் 15வயதிலிருந்து .

கற்களின் சாயல்

---------------------

எல்லா கற்களிலும்

ஏதோ உருவமொன்றின்

சாயல் தெரிகிறது .

இதுவரை அச்சாயல்கொண்ட

உருவங்களுக்கும் ,உங்களுக்குமான

சந்திப்புகள் நிகழ்ந்திருக்கவில்லை

இதுவரை

நீங்கள் சந்தித்த உருவங்களின்

சாயல் கொண்ட கற்கள்

வேறொருவனின் கைகளிலிருகின்றன .

இப்போது அவனுக்கான கற்கள் உங்களிடம்

இருப்பது போலவே .

பதிவேடு

-----------

பறவையொன்று

விட்டுச் சென்ற

சிறகொன்றையெடுத்துவந்து

உன் மைக்கூட்டில்

சொருகியிருக்கிறாய்

எப்போதேனும் சிறகுமுனையில்

மைதொட்டு உன் வாழ்க்கைக் குறிப்பை

எழுதி வைகிறாய்

உன் பதிவேடு காலியாயிருக்கிறது .

உன் குறிப்புகள் எப்போதும்

அந்தரத்தில் மிதந்தபடியிருக்கின்றன

உப்பளம்

------------

உப்பளத்தில் அமர்ந்து

அழுது கொண்டிருந்தாள்.

ஒருவன் அவள் அழுகையைப்

பிரித்துப்பிரித்து

பாத்திக்கட்டிக் கொண்டிருந்தான்.

சற்று தூரத்தில் நின்று கொண்டிருந்தன

அவள் அழுகையை

வெவ்வேறு ஊர்களுக்கு

ஏற்றிச் செல்லவிருக்கும்

லாரிகள் ....

வண்ணத்துப்பூச்சி

---------------------

17வருடம் கழித்து பார்த்தேன்.

எதிர் திசையில்

அவள் மகளோடு போய்கொண்டிருந்தாள்

பார்த்துவிட்டு எதுவுமே பேசவில்லை .

அந்த கணம்

அவள் முகத்திலிருந்து

வயதான வண்ணத்துப்பூச்சியொன்று

வெளியேறி பறந்து செல்கிறது

வேகவேகமாய் இறக்கைகளை அசைத்தபடி

சற்றே பதட்டமாய் .

பிரசவ வார்டு

---------------------

மருத்துவமனை பிரசவ வார்டில்

பரபரப்பாய் ஓடிக்கொண்டிருந்தன எறும்புகள்

ஈனும் வலியில்

"அம்...மா" வென அலறியது

பெண் எறும்பொன்று

அதே வார்டில்

பிள்ளைப் பெற்றிருந்தவளை

பார்க்க வந்திருந்தவர்கள்

எடுத்து வந்திருந்த பாட்டிலில்

ஹார்லிக்ஸை திருடிக்கொண்டிருந்தன

சில எறும்புகள்

பிள்ளைத்தாச்சிக்கென ...

பிள்ளைத்தாச்சிக்கென .

காலச்சுவடு இதழ் 92 ல் வெளியான 3 கவிதைகள்

2009-05-21T22:25:00.000-07:00

புத்தகத்தின்

73ஆம் பக்கம்

கிழிக்கப்பட்டிருக்கிறது

அதில்தான்

தம் கரும்புரவியை

மேய்ந்து வரும்படிக்கு

அவிழ்த்துவிட்டிருந்தான் வீரன்

கிழிந்த பக்கத்தைத் தேடி அலைகிறான்

வாசகன்

குதிரையும் வீரனும் ஒருவரையொருவர்

தேடி அலைகின்றனர்

கிழிந்து விழுந்த கானகத்தில்.

முழுவதும்

வரைந்து முடிக்கப்பட்ட ஓவியத்திலிருந்து

பறவைகள் பறந்துவிடுமென எண்ணி

அதன்

சிறகுகளை மட்டும்

வரையாமல் விட்டு வைக்கிறாய்.

பின்னொருநாள்

வெறிச்சோடிக்கிடக்கிறது

பறவைகளற்ற ஆகாயம்.

காணாமல் போய்விட்டது

உன் தூரிகை.

மலையடிவாரத்திற்கு

மேய்ச்சலுக்குச் சென்ற

எருமைகள் திரும்புகின்றன

அந்த மாலையின் இறுதியில்

புறவழிச்சாலையின் வழியே

ஊருக்குள் நுழைகிறது

இருள்

தன் கழுத்து மணியோசையை

எழுப்பியபடியே.